गीत रतजगा की घरबत बड़ी

ऐ बीरा थापी थुप्पी होई तैयार गाड़ा भर ले आवो जी
ऐ म्हारै ल्याया है गाडे में घाल लाए उतारि चैक में जी
ऐ म्हारी घरबत माता सुच्च धरो जी
ऐ बीरा पार्वती कै गणेष जी नै ल्यो रै बुलाये,
तो घरबत माता सुच्च धरो
ऐ बीरा सुरगापत सै पित्तरां नै ल्यो रै बुलाये,
ऐ बीरा दादसराजी कै बेटे नै ल्यो रै बुलाये तो,
उनकै आये काज सरै जी
ऐ बीरा यो कुण मिण-मिण दे पातलिया, यो कुण फेरै सुतली जी।
ऐ बीरा सुसराजी मिण-मिण दे पातलिया, बेटा फेरै सुतली जी।
ऐ बीरा मिणी-मिणाई नींव होई ए तैयार तो, चेजी बेटा बुलाइयाँ जी।
ऐ म्हारै गज-गज नींव भराये तो आंगन राखौ लग लगा जी
ऐ बीरा बांटन लागै गुड़ डली जी घरबत माता सुच्च धरो।
ऐ बीरा लाडुआ का महल चिनाये तो, बर्फी की मुण्डेर बंधाइयों जी।
ऐ बीरा पापड़ां के किवाड़ लगाए तो,
सांकल लगाइयो बीरा सार की जी।
ऐ बीरा जलेबियां के जंगले लगवाये तो,
खूंटी लगाइयो बीरा लौंग इलाइचियाँ की।
ऐ बीरा चीणी चीणाई होई ए तैयार तो, लीपण वाली चाहिऐ जी।
ऐ बीरा लीपै पोतै घाल मंडेरै हाथ तो, थारी ओ दादसरा कुलबहू जी।
ऐ बीरा लीपै पोतै घाल मंडेरै हाथ तो, थारी ओ सुसरा कुलबहू जी।
ऐ बीरा लीपी लीपाई होई ए तैयार तो, चीत्तण वाली चाहिऐ जी
ऐ बीरा चीतै माण्डे लिखै कलाई मोर ज्यूं,
थारी ओ दादसरा धीवड़ी जी।
ऐ बीरा चीती माण्डी होई ए तैयार तो, घी भर दिवला चासियों जी
ऐ म्हारै दिवले मैं मल के बाती घालै, राधा,
या घरबत तेरे बाप की जी
ऐ बीरा घी भर दिवला चास बहू रुक्मण, या घरबत थारै सुसरै की जी।
ऐ बीरा घरबत माता होइये तैयार तो, नीरखण वाले चाहिऐ जी
ऐ बीरा सुसरै कै बेटे नै ल्यो रै बुलाये
अपनी घरवत सुच्च धरो जी
ऐ बीरा जेठ कै बेटे नै ल्यो रै बुलाये तो, खेलै छजा रावटी जी।
ऐ बीरा देवर कै ष्यामु नै ल्यो रै बुलाये तो,
रतन कचोला दूध पीवै जी
ऐ बीरा म्हारी घरवत होइए तैयार तो खाती बेटा बुलाइयो जी
म्हारै ऐ पीछोकड़ राय चन्दन का रुख तो,
यो खाती कै चित्त चढ़ा जी।
भर लाया गाड़ा दो-चार तो, लाये उतारा चन्दन चैक मै जी।
ए तू खाती बेटा चतुर सुजान तो धीरे-धीरे चिरियों जी
ए म्हारै पित्तरां जोगा पाटा घड़ लाये तो, पितरानी जोगी चैकी जी।
ए म्हारै हनुमत जोगा सोटड़ा घड़ लाये तो, देवी जोगा पाटड़ा जी।
ए म्हार सतियां जोगा पाटा घड़ लाये तो, म्हारी मावली जोगा पालना जी।
ए म्हारै छोरां जोगा मुढ़ला घड़ लाये तो, बहुआं जोगा पिडला जी।
ए बीरा घड़ी मंडी होई ए तैयार तो, सिर धर खातन निसरी जी
ए बीरा पूंछ पूंछ षहर के लोग तो, या खातन कित जाइयो जी
म्हारै ए सुसरे कै जगै विरद की रात तो, या खातन उठै जाइयो जी
ए या ल्याई सै छाबड़िया मैं घाल तो, ल्याए उतारी चोक मैं जी
ए बीरा खाती कै नै पीलंग बिछाये तो, खातन पीढ़ा साल का जी।
ए वीरा खाती नै मुरकी घड़ाए तो खातन पायल बाजनी जी
ए बीरा खाती कै नै चावल रन्धाये तो, खातन लपचप लापसी जी।
ए बीरा खाती कै नै बुरा ए घलाये तो, खातन धबसा नुण का जी।
ए बीरा खाती कै नै घीरत घलाये तो, खातन पलिया तेल का जी।
ए बीरा खाती नै हिरगीर पूछै तो, खातन पूछो बीरा एक बारी जी।
ए बीरा खाती कै नै पाग रँगा ये तो, खातन नोरंग चुन्दड़ी जी।
ए बीरा खाती नै करो ए विदा घर जाये, खातन दिन दस राखल्या जी।
ए बीरा खातन म्हारै टाबरियाँ की मांए तो, खातन छोड्याँ ना सरै जी।
ए बीरा खाती बेटा चतुर सुजान तो, और घड़ले बीरा काठ की जी।
ए बीरा घड़ ल्यंुगा दोयर चार तो, मुख सै ना बोलै काठ की जी।
सार नै सारै काठ की।
घरबत माता सुच्च धरो जी।
खाती बेठा चतुर सुजान तो खातन थारी ले चलो जी।
ए म्हारी चलती खातन देवे आषीश तो,
लदियो-बदियो सारा परिवार जी
ए फलियो कड़ैव नीम ज्यु बदियां हरियल दूब ज्यु जी।
ए बीरा थोड़ा-थोड़ा चावलिया रंधाये तो,
घणा रंधादो बीरा खिचड़ा जी।
ए बीरा चावलिया तो बहन बेटियाँ न जीमाये तो,
खीचड़ा जीमै म्हारी कुलबहू जी।
ए बीरा थोड़ा-थोड़ा पोमचा रँगा ये तो, घणा ए रँगा दो बीरा पीलिया जी।
ए बीरा पोमचा तो बहन बेटियाँ न उढाये तो,
पीला ओढ़ै म्हारी कुलबहू जी।
ए बीरा बहन-बेटी घर अपनै जाय तो,
धरया ए उघाड़ै म्हारी कुलबहू जी।
बंस बढ़ावै म्हारी कुलबहू, हँस-हँस बोलै म्हारी कुलबहू जी।
काम सारै म्हारी कुलबहू बैठण घालै म्हारी कुलबहू जी।
ए म्हारै देई देवता चढ़ो ए विमाण तो,
हम सेवकां थारी रात जगाई जी।
धरवत माता सुच्च धराँ जी
नोट: परिवार के सभी बड़ो व छोटों के नाम लिए जाएँगे।