गीत गूगा का

गूगा जी थाराः घोडलिया, कोई चरै गठीली, घास। गूगा रुणझुनिया।
गूगा जी थारी, कुल बहू, कोई रान्धै उजली खीर, गूगा रुनझुनिया।
गूगा जी थारी छोरड़ी, कोई गावै गूगा का गीत, गूगा रुनझुनिया।
गूगा जी थारे छोरडे़, कोई आवै गूगै की जात, गूगा रुनझुनिया।
चढ़ै न चढ़ावै चूरमा, कोई चढ़ै सिर चोटी नारियल, गूगा रुनझुनिया।

गूगा जी का गीत

जाल सब भिनभिनी, तु क्यूं ए म्हारी हरियल जाल,
वारि मेरे गूगा भलरिया
के तनै माली सिंजिंया, के तेरी जड़ गई पाताल,
वारि मेरा गूगा भलरिया
ना मनै माली सिंजिंया, ना मेरी जड़ गई पाताल,
वारि मेरा गूगा भलरिया
गूगा सोया बड़ तलै, सोया ए वो चादर तान,
वारि मेरा गूगा भलरिया

गूगा की मांए जगाइयां, उठो रे मेरा, लाड़न पुत,
वारि मेरा गूगा भलरिया
के तू सुत्या नींद मैं, ले गया रे तेरी लागड़ गाय,
वारि मेरा गूगा भलरिया
मुन्दा पड़ा बिलोवना, रिते रे तेरे जा छछियार,
वारि मेरा गूगा भलरिया
गूगा उठ्या छोयला, मड़कै री पिलंगा कि साल,
वारि मेरा गूगा भलरिया
ल्यायो री माँ पांचु कपड़े, पाँचो ए मेरे लायो हथियार,
वारि मेरा गूगा भलरिया
करै करोगे कपड़े, केरै करो पांचो हथियार,
वारि मेरा गूगा भलरिया
पहर चलेंगे कपड़े, रण जीते पांचो हथियार,
वारि मेरा गूगा भलरिया
पहर ओढ़ कै चल पड़या, कांधे ए या धरी तलवार,
वारि मेरा गूगा भलरिया
पहर ओढ़ के चल पड़या, ल्याया ए यो गऊ छुड़ाए,
वारि मेरा गूगा भलरिया
सीधे होए बिलोवने, भर-भर के जा छछियार,
वारि मेरा गूगा भलरिया
मारकूट कै बावड़या, माता ए मेरे हाथ धुआ,
वारि मेरा गूगा भलरिया
के कोई मारया मिृगला, के कोई मारया वन का षेर,
वारि मेरा गूगा भलरिया
ना मैं मारा मिगला, ना मै मारा वन का षेर,
वारि मेरा गूगा भलरिया
अर्जुन मारा बड़ तले, सर्जन रे सरवर की पाल,
वारि मेरा गूगा भलरिया
बुरी करी रे मेरा लाडला, तनै मारा री मौसी का पूत,
वारि मेरा गूगा भलरिया
मौसी देगी ओलमा, मामी री तनै देगी गाल,
वारि मेरा गूगा भलरिया
जा रे गूगा मुंह न दिखा, गूगा रे तू जा नै समाये,
वारी मेरा गूगा भलरिया
पाटो ए धरती धर्म की सुघोड़े जाएंगे समाये,
वारि मेरा गूगा भलरिया
धरती माता पाटगी, सुघोड़े वो गया ए समाये,
वारि मेरा गूगा भलरिया
अब तक तो मंै हिन्दू था, अब हुआ मैं मुसलमान,
वारि मेरा गूगा भलरिया
अब तक धौके बामन बणिये, अब धौकेंगे छत्तीसों जात,
वारि मेरा गूगा भलरिया।