म्हारै धोलैगढ़ जोत संवाई मेरी माँ
गले रानी थारै सतलैड़ा सोवै, थारै ऊपर हार हजारी मेरी माँ
कान रानी थारै कुण्डल सोवै, ऊपर तोता वाली मेरी माँ
अंग रानी थार साड़ी सोवै, ऊपर चून्दड भारी मेरी माँ
हाथ रानी थारै चुड़ला सोवै, थारै मेहँदा री जोत सुवाई मेरी माँ
पैर रानी थारै पायल सोवै, थारै बिछुवा नै रुण झुण लाई मेरी माँ
सवा ए तो मण की रानी करूँ ए कढ़ाई,
थारै सोने का छत्र चढ़ाऊँ मेरी माँ
इबक तो गुनाहे बकस दे भवानी, तेरी जय-जय करती आऊँ मेरी माँ
तेरै गोद झडु़ला लाऊँ मेरी माँ, सदा ए गठ जोड़े से आऊँ मेरी माँ

भूरी-भूरी पीण्डी में चोड़ी-चोड़ी पायल तो, पैहर चलूंगी बलमा
आगै-आगै बलमा पीछे-पीछे गोरी, तो गोद लीया ललना
भवन गढ़ ले चलो जी बलमा
मैया के भवन पर भीड़ हुई, तो बीछड़ गया री बलमा
सवा ए मण की मैया करूं ए कढ़ाई, तो जै घर आवै बलमा
भवन गढ़ ले चलो जी बलमा
सवा ए तोला गा मैया छत्तर चढ़ाऊँ, तो जै घर आवै बलमा
सवा ए गज की मैया ध्वजा ये चढ़ाऊं, तो जै घर आवै बलमा
भवन गढ़ ले चलो जी बलमा
मैया के भवन पर छीड़ हुई, तो आपे ही आए बलमा
पीछे मुड़ के देखण लागी, तो पास खड़े री बलमा
भवन गढ़ ले चलो जी बलमा
सवा ए सेरकी मैया करूँ ए कढ़ाई, तो आपे ही आए बलमा
सवा ए माषा का मैया छत्तर चढ़ाऊँ, तो आपे ही आए बलमा
भवन गढ़ ले चलो जी बलमा
करी ए कढ़ाई मेरा कुणबा खाई, तो भूल गई बामणां
छोरा बी खाई मेरी छोरियाँ बी खाई, तो एक पीण्डी बामणां
भवन गढ़ ले चलो जी बलमा